呢個楂咪甫士真係一絕，仲話唔係cult片？
做創作嘛，有時候真係只要對自己同老闆負責就可以（聽講都幾收得，可以飲得杯落），個仔生咗出嚟得唔得人鍾意，真係好難講。
無錯，我想講【殺人犯】。
好多批評啊，聽講明報畀到負一粒星（當然日月報宜家係最政治正確嘅報紙，呢啲邪片睇壞人，唔畀星都唔夠狠），又聽講大家話套戲荒天下之大謬，上半場懸疑片下半場變笑片，起承轉合錯cue哂，唔明點解trailer同咁多細節伏線都講幾單殺人案嫌疑都指向郭富城身上，但到最後「真兇」突然come-out爆大鑊，一五一十和盤托出，反高潮反高潮，大家一邊鬧，另一邊「本來都想睇，聽你咁講，都係唔睇。」留言不絕於耳，不正正就係Worth of mouth marketing一幣兩面？
點講，【殺人犯】都係成功咗，呢個年代最怕就係出咗碟都無人知，套戲落畫都無人講。
-------------------------
無常。
懸疑片其實唔一定要觀眾做探長動腦筋，電影是電影嘛，鏡頭其實已經讓我們看得太多，但真正線索又相當有限，如果官方真係志在打破懸疑片格局，【殺人犯】就係要讓習慣用推理心態睇懸疑片嘅觀眾清醒，到謎底打開之時，全場嘩然暗忖恥笑「有無搞錯!?」，其實不過係要引證出﹣真相的無常／失常。
無常，失常﹣其實更接近現實，如同周邊倫常慘劇，如同政壇粗口橫飛，如同九一一，你看見慘不忍睹又核突的鏡頭，但你喺發現一刻無可能招架，無可能即時理解呢股暴力嘅緣由、背景，所以你會覺得好odd，會覺得好離譜，會覺得當事人自圓其說。
我想講嘅係，無常，就係無起承轉合，【殺人犯】，就係拍出暴力本質那種極致性。
不過，無常不是意外，看上去係偶然之下一場晴天霹靂，背後唔係無端端發神經，如果大家一早知道結果，或者會發現導演編劇在上半場也不是沒有留下的蛛絲馬跡（這個也有人提，不轉述了），不過導演編劇都選擇「出術」，就連謎面也要引導大家投進推理陷阱，到後半部真兇妖魔一面終於現形，將不為人知故事變成左右大局的證供，像小孩拿著刺人的小刀，提出不為世人所動的控訴。
價值觀縱是顫倒，但它是真確地醖釀而存在過，像一切粗野的公民抗命，像一切認真堅邪惡的恐佈襲擊，真情假意還是走投無路的手段，不是一句「有無搞錯」就可以為它的正當性定下結論。
當電玩世界的暴力無分政治正確演變成流行感官體驗，【殺人犯】就是棄人性光輝，又有何不妥？
「但我好記得在後期製作時，李屏賓的一句說話好打動我。他說我在某程度上已經成功了，因為這個劇本最困難的地方就是要有冒險精神。正如他所講，我年輕、無包袱，也並未建立自己的風格，所以我肯冒險；這亦是為何江志強要找我來執導的原因，如果我不是有這種冒險精神，根本不需找我來拍，更不需拍這樣一齣電影。」
（錄自導演於文匯報訪問）
冒險精神，正是創作的意義。
-------------------------
我當然唔係要替導演編劇講說話，或者佢哋想講嘅同我所睇嘅根本係兩件事，不過，單係睇douban同一大班bloggers猛烈回響，我真係覺得，電影拍出來就已經成為另一個生命喇。或者，今日所謂不合邏輯／無情理可言／邪惡嘅事，到20年之後可能一啲都唔離奇（如果宜家一心本住睇現代聊齋奇談嘅話都OK），有人話呢套係唔合格嘅CULT片，我想話，好多CULT片唔知要等幾多年先有人掘山墳咁掘番出嚟拜！
除此之外，李屏賓攝影、梅林茂配樂、文念中美指，班底咁強，技術和官能上都帶來唔少深刻震撼，就只係除咗幾幕鏡頭（郭富城隨屋拿刀自衛，有妄想被害症似的）拍得相當諧趣，明顯跟電影基調不合。
人性乃一念，以殺生而求生，以暴力奸謀奉為生存之道，有病與正常，也只是一線之差，片尾交錯郭富城和真兇兩人下場的畫面，被大家看成延伸續集的尾巴，姑勿論有沒有續集，【殺人犯】也帶來了一個值得深思的結局。
相關
好難揾到呢套戲有人唔係鬧住寫，咁啱讀到kattie最新博文，又有另一個角度，有興趣睇睇！
