日蝕奇景

日蝕奇景

一朝早落街,見到呢位先生喺車房門口拎住塊燒焊面具套住部VIDEO CAM影日蝕。 今日全城得兩大話題,日蝕同書展。 千幾人排隊輪街症咁睇書對「書迷」嚟講應該都話哂一年一次,但係日蝕五百年一次喎,加上報紙連日大造聲勢,睇日蝕好似變咗全民運動咁,怪不得一大朝早就有人去太空館排隊睇日蝕(哈哈,原來同事都有去,認真唔講得笑)。 而我就因為瞓得太好,一心只係搏好彩喺屋企望出窗,睇吓有無暗黑太陽,當然無啦。亦因為無乜準備嘅關係,所以就索性喺屋企整太陽旦。 我覺得,周街都有人企响度抬高頭,先係日蝕熱潮嘅奇景,好似商業區大街幾個OL相約戴哂黑超係樹下面輪住用一個望遠鏡偷窺日光,場面實在令人發笑。 卒之十點鐘比我喺公司窗口望出去見到咬崩角太陽,不過影唔到喇,快門1/500都無用。 註: 大家都喋喋不休講「日食」定「日蝕」係正寫,我決定棄權,都係用番細個科學書用嘅「日蝕」。