大家都話，社交網路越來越多，一時又玩微博，一時Facebook，仲未計令人好鍾意用手機影相嘅instagram，咁多嘢玩，就算聽到新嘢都話要揀過先試，再可能Hit得起嘅社交網越來越少，如果無乜新綽頭，換湯不換藥，就好難叫人「跳船」試玩，咁啱，最近好多朋友加入咗一個名為path嘅社交網路，呢個由去年年初問世嘅玩意，到上個月改版重新受到注目，究竟有乜特別呢？
2010年11月，Napster首席軟件工程師 Shawn Fanning 及前Facebook行政人員Dave Morin正式創立Path，背後意念大有來頭，據知，從人類學嘅研究數字Dunbar’s Number指出，一個人無法管理超過150個朋友嘅社交圈子，Dave Morin強調要建立一個更可信、緊密且有質量嘅個人網絡，Path以Dunbar’s Number作為根本，預估出一個人喺最親密嘅關係圈子會有5個密友，15個經常會見面，相互認識又信任對方大約係呢個數字嘅三倍，從而得出50個朋友為限嘅個人網路。 Dave Morin又認為，Path唔會係一個好似Facebook/Twitter一樣以個人宣傳、發佈消息嘅平台，而係真正認識你本人之間嘅朋友交流，透過一張私照分享，就只有熟識你嘅朋友先會了解你私照背後的心事。
所以，最初Path網站開通之時，亦推出對應iPhone程式，讓每一個用戶可以跟50個朋友分享私照，另一個特別之處係，每次你分享一張相，有邊個朋友睇過都會顯示喺相側邊註解， 換言之，要知道邊個朋友有留意過你邊個秘密，大家都一清二楚。（呢個亦假設咗你同朋友已經親密到佢唔介意被你知道）。
記得去年年初試玩過，覺得介面都相當好用，不過只能夠Share相始終係一個局限，最後就好似好多試玩過嘅App一樣被放棄。
估唔到，一年之後，Path再一次重生。
首先， 新版將朋友圈內可分享近況嘅朋友上限提高至150人。另外仲增設Android版，根據大部份用家都透過手機登錄Path ，原來嘅網頁版已經停止運作。
打開新版Path手機 App，介面好快可以上手，畫面就好似Facebook timeline倒數住你同朋友發佈過嘅近況，無論睇相、留comment都比好多社交網路簡單流暢， 新版app影相功能更加入filter 效果，效果拍得住instagram，玩厭仲有marketplace販售更多filters。
分享私相之外，仲可以俾你同密友分享更多個人近況，例如check in打卡功能，Path已經連接好多唔同種類嘅餐廳、場所種類，唔似其他好多Location services 需要大家做「開荒牛」填寫地方介紹，個人認為，Path嘅打卡系統甚至要比Facebook 方便。
如果你已經厭倦Facebook好忙咁Check 唔太熟嘅朋友更新、廣告訊息，又或者你其實只係想同親密嘅朋友Social，又唔太會玩Facebook game，亦唔會對邊個品牌喺Facebook搞嘅宣傳活動有興趣，Path可能就啱哂你喇！（不過同好多「跳船」行動一樣，要叫足夠嘅Friend轉玩，閣下少啲號召力都唔得！）
深交朋友無秘密，每一段更新訊息俾邊個朋友睇過，Path都會顯示。
Path亦有一啲人性化設計，例如你就連瞓覺都可以發佈，當你啟動睡眠狀態， Path會發一條Update提醒朋友，並停止接收朋友更新嘅提示訊息，當第二朝起身㩒個wake up button，Path 會自動發佈一條訊息，話你知你當晚睡眠所需嘅時間、身處地方嘅氣温！
唔係Instagram，Path嘅Camera filter都相當好用，而且仲可以俾錢買更多加強版Filter。
Facebook Close Friend設定 提升關注「密切度」
有玩開Facebook嘅朋友或者都有留意最近Facebook加入Close Friends功能，無他，由一面之緣到深交嘅朋友一路加落去，要消化Facebook Wall上嘅朋友近況應該已經花時間喇，所以Facebook背後有計算平時跟你互動得最多嘅朋友，佢哋嘅消息將會優先放喺你嘅Wall之外，亦因為咁，有啲平時少用Facebook但係同你好Friend嘅朋友可能就會較少機會喺你嘅Wall上出現，而Close friends就係令你可以人手將較親密朋友嘅訊息優先處理，除咗一定會安排置於Wall上，亦會以notification通知。
(同文見於jiujik 13-01-2012)
延伸閱讀:
|
|
|
訂閱留言
站長管理