由去年九月開始用nike+紀錄跑步，到最近才開始發掘官方網站各項功能，比如參加站上其他跑手開設的挑戰，雖然我不是那些看見人跑得快自己也會拼死追那種跑手，不過，加入這類挑戰，無疑令跑手更留意自己跑步的表現，而訂立個人短期跑步目標，或是累積跑距之類的數字，更將跑步這種日常活動轉化成收集經驗值的遊戲。

即將發表的nikerunning.com將會結合產品介紹及nike+網站的個人化功能，根據官方新聞率先提供了幾個更新重點：

1)　跑鞋專家: 簡單解答幾條關於跑步習慣的問題，網站的跑鞋查找器會為你推介最適合的跑步產品。
2)　跑手日記: 增強跑手對跑步運動的熱情，透過每次跑步可個人化記錄心情／天氣／地形／路線等資訊。
3)　導航系統: 不是GPS，而是指網站上的navigation將大大改良，讓跑手便於快速查看站內訂下的跑步目標和進度
4)　社交功能: 更方便在站內找跑手朋友，挑戰他們或發出邀請，更可將跑步紀錄自動發布twitter/facebook社交平台。
5)　挑戰和訓練功能改良: 加入更詳細及專業的挑戰／訓練，讓新跑手更容易達到個人化的跑步目標。

在可以享用新功能之前，大家也可以透過第三方軟件/服務，提升nike+的效用，都是最近找到的，都試過，蠻好用:

TWIIKE: 讓twitter自動發布你的跑步紀錄
http://www.twiike.com/

讓facebook自動發布你的跑步紀錄
http://apps.new.facebook.com/nikerunapp

掛一漏萬，當發現無帶nike+感應器，或者ipod突然無電，如果你又有跑步機check到跑距同時間，你仲有最後一著：自動生成nike+跑步紀錄
http://nikeplusedit.com/
（咁係咪即係無nike+都可以用nike+ site??）

相關連結
短談nike

現在每次跑步都用nike+，但其實最初接觸對它印象很壞。

magic number 5

最新一期wired 披露，大多數nike+用戶初步上載跑步紀錄時，都抱著嘗試的心態，而研究員分析特別指出5次是開始投入nike+society的臨界點，即是說，大部分上載逾5次的用戶都會繼續使用nike+跑步後上載紀錄。

basic science
看來好high tech 的nike+背後其實是充份運用一個近40年前的科研調查結果：跑速跟腳底跟地面接觸的時間成反比。而感應器的構造就只包括一個「計時」件、發射到ipod/sportband的機件和一次性電池而已。

it wasn't designed to be perfect tool!?
ipod+itunes的組合就證明軟件實踐產品設計意念的重要，要是nike+沒有網站的社群功能，根本就不是什麽新發明，Nike TechLab 主管／Nike+案策劃人之一的Michael Tchao就解釋: "We really wnted to separate ourselves from that sort of very technical, geeky side of things, everyone understands speed and distance."　這大概也解答了很多詬病nike+沒有心跳測量／GPS tracking的問題。
而nike+有別於步速手錶等工具的重點在於：它的社群性。透過peer groups/ competition為跑步運動注入videogame motivation，他們想做的正是，running community。

fix errors!
跟地面接觸的時間對測量跑速有相當關鍵性，所有測量都有誤差，我猜，如果全程跑步向後提腿都保持穩定，就可以將誤差減到最少。
當然每個人跑步的style也不同，所以更有必要在使用初期進行校正，及保持自己的跑步style，例如步幅。

(待續)
今夏，nike+網站快將有新版面，聽聞將會加強更多功能，再看吧!!
(說了太多好話，但其實，這裡沒有任何廣告商贊助)

小學時候教過，密鋪平面，無諗過mouse cursor都可以密鋪平面。
早陣子，我們的「村上先生」叫大家到他的桌面玩了這個遊戲:
在這幅wallpaper上面找cursor。

比我影到，算你哋唔好彩，呢張相無放大。

題外話
唔知點解，炮台山間Burger King有張高枱總係無人食嘢，每次去都見有保險經紀或者合約職人同客簽文件。

最近鍾意食軟雪糕，10蚊樓下，試吓無壞，無謂嚴選啦。

第一位　Burger King朱古力新地　($9)
半年前要選好食軟雪糕的話，麥當當的雪糕新地和麥旋風應該都入我的最愛三甲，不過試過漢堡王的話，又點會返轉頭呢？就咁睇上去分別不大，仲少咗麥當當雪糕新地有咬口嘅花生，不過重點都係軟雪糕嘛，如果雞要有雞味， 呍呢嗱雪糕當然要有呍呢嗱味，食過漢堡王新地，先覺得麥當當新地唔係真嘅呍呢嗱。

第二位　OK便利店豆腐味軟雪糕 (約$4)
有兩個重點，豆腐味夠濃，質地夠硬淨。便利店軟雪糕經常轉款，除咗朱古力同呍呢嗱嘅特別口味都只係期間限定，最近呢隻豆腐味又重新登場。

第三位　富豪雪糕筒　($7)
好多細嗰時食嘅嘢都變咗味，好似維他奶，近四十年歷史嘅富豪雪糕最難得係，咁多年都咁好味，做到味道不變呢件事，都足以成為經典。

20蚊就可以試勻三客軟雪糕，不過一客軟雪糕的卡路里都唔少(200-300卡)！

P.S.
論到軟雪糕，不能不談日本啦！除咗將好多古怪口味嘅軟雪糕發揚光大，就連味道視覺都有學問，原研哉有本《Ex-formation RESORT》談到軟雪糕製作機噴咀設計，還有雪糕筒的實驗構思，大眼眼界呢！

這書收錄多個生活實驗，談的正是設計和結構與生活之間有趣而微妙的關係。

Ex‐formation RESORT @阿撈B
http://www.anobii.com/books/Ex‐formation_RESORT/9784120037627/01b7810920a30140a3/

唔經唔覺返來有一個月喇，呢篇算叫同個旅行埋單，收歸記憶封存。

講起去旅行返嚟仲有心機寫旅記都要數到五六年前，之後每次旅行都只係事前做足準備工夫，回程無論喺飛機計劃點將整個旅程記錄落嚟，最後都總係不了了之，當然好大原因係諗法太多，由一手一腳自己用AS程式砌本flashzine到宜家import一個PDF就可以自動生成一本可以flip的flashzine。唔知幾多次旅行儲埋一袋二袋菲林／相／明信片／唔同地方攞埋攞埋嘅freepaper+單張，早陣子搬屋要用一個紅白藍處理。

snapshot其中一個意義就係咁簡單，隨時記低每一個時刻，由EXIF事後重新勾勒整個旅程嘅timeline。

華欣大馬路途中，發現一個私人花園，開滿刺眼鮮花。

曼谷siam discovery center見到Issey Miyake 一手企劃Pleats Please嘅門市，好貴，買唔起，但係想話呢個label啲用料好特別，真係唔買都要入去睇吓。

明碼實價，50batt一隻，但係想話去咗幾日華欣，無買過生果，只係喺早餐食過。

主要嘅大街都走過，之後就真係亂走，巷仔又行，日光日白紅燈區又行，睇吓周圍閒人家常。

周圍都有泰王相。spa有，街市檔仔有，seven都有。

夜市其實只係一條廟街，立立雜雜，趁墟都可以，但係同台北夜市嗰種熱鬧同多古靈精怪嘢係兩件事。

一路都覺得泰國人對甜嘢食嘅標準好古怪，可能新鮮果汁太甜，人工紙包果汁就甜到假，唔似畀人飲，夜市最旺其中一檔係地道街邊雪糕，本來無諗住試，但係咁多人都堆住幫襯，無理由唔試。

結果係，好好好！！一set三球25 batt，真係抵食大驚喜，起碼好食過澳門土產禮記。

最後一夜。
每晚都係坐篤篤返酒店。

今次有三部相機（唔計一部即棄MUJI），下次唔會再帶Holga。

回程的士見到車上地圖書放咗一張mind healing map，古怪。
司機係一位太太，佢話無帶過好似我們呢啲年青人由華欣到曼谷機場，特別帶咗啲啱我哋聽嘅CD。沒錯，當然係盜版啦，係Jack Johnson, 仲問我哋啱唔啱，唔啱佢可以轉，但係唔知點解播吓播吓，變咗好似啲New Age嘅淨音樂，再跟住係Rod Stewart，再跟住係Air Supply，三粒鐘，我覺得自己老咗好多。

P.S.
睇住啲相，真係可以諗番好多旅行回憶，當然，有啲畫面，就算無相喺手，都會咁記得。

(泰國旅記2009之六）

泰國旅記連載
旅記1 - 曼谷．真夏
旅記2 - 凱旋廣場．旅行歌單
旅記3 - 09 S/S resort style
旅記4 - 帶一本旅行書去華欣
旅記5 - 海邊的日子

更多相片
曼谷華欣052009 flickr相集

借朋友呢本書幾日，於是近來都速讀關於SEO(搜尋引擎最佳化)的。

其實都幾討厭呢種書名，什麽如何讓網站排名第一，因為如果第一真係有得讀，大家都去讀，咁仲有邊個排第二呢？所以點講都只係巧立名目，至於SEO，因為都跟工作有關，所以讀上去又唔覺得有好多新知灼見，不過以中文網技書來講，關於SEO嘅書其實唔多，如果對呢個話題有啲興趣又唔想下下不停延伸搜尋嘅話，睇完都可以有個概括了解嘅。

因為咁，所以網誌都加咗個plugin，叫Add Meta Tags，可以自動將blog post的tags自動放入meta keywords, Exerpt的內容自動放入meta description。

都係果句，SEO呢啲嘢，少咗未必覺得蝕底，多咗又覺得唔洗花好多功夫。

如果閣下鍾意去陽光與海灘嘅地方度假，華欣頂多可以滿足你邊度都有陽光嘅要求(基本上好似所有度假勝地一樣，唔洗睇天氣預測，因為通常話落雨都只係誤報，又或者只係過雲雨)，至於海灘，望吓都可以嘅。

有眼見啦，水母啊，成個海都係水母，唔好話游水，附近都唔似蘇梅或者布吉有水上活動。認真想玩嘅話，都係join boat trip啦!

碼頭港口在市中心大路的東邊，火車站則在大路的西邊，不過其實半天都可以行完兩個地方。

沙灘都有好多曬太陽嘅水母，呢隻算細喇。

沿住海灘行到盡頭走上筷子山，有好多貓嘅小寺廟。

你無睇錯，山上面有間porn thai massage，但係成個場都係open area，唔明係佢地英文出事，定係有暗黑架步？不過睇檔主面口，真係唔似風月場所喎！

我哋問准走上去木架的台上拍照，其實如果要玩原始去流浪的話，租間海邊或者山上的guest house，嘆嘆海風massage也實在不錯呢。

碼頭港入夜先開始熱鬧，沿海都係海鮮餐館嘅燈火。點客海鮮，飲杯冰可樂，啤酒都好，一樂也。

(泰國旅記2009之五）

泰國旅記連載
旅記1 - 曼谷．真夏
旅記2 - 凱旋廣場．旅行歌單
旅記3 - 09 S/S resort style
旅記4 - 帶一本旅行書去華欣

一個海港只得一個海港城嘅話，都幾灰。
離開resort走入市中心，就連一個城嘅感覺得無，除咗食同按摩，真係咪指望出面有乜好行，華欣唔似蘇梅島有 moon party，店舖都唔多，好唔容易去到唯一一個大商場都係得家樂福類超市同連鎖咖啡店，要行市中心，三個鐘都好足夠。

講係咁講，我都係重覆係市中心浮咗三日。原本打算找local tour agent join團去桂河橋（都係因為老西片先成為外國流浪人問津嘅地方），點知華欣要去桂河橋一個單程都坐三個鐘火車，跟tour的話要六點鐘出發晏晝五點返。退而求其次，join比較熱門嘅National park，聽講都要坐獨木舟去嘅，時間係九點出發三點返。

一切聽落都唔錯...好可惜，無人開檔，去唔成。

「下次啦，反正住resort短短幾日，應該好好享受下先係。」

「如果有下次的話。」

結果幾日喺市中心，最巴閉係去咗旅行書介紹所謂「最美麗的火車站」(都恨無計劃，如果唔係都唔會臨急問朋友借旅遊書)

到市中心第一件事是找tourist center，就係佢哋話畀我哋知桂河橋有幾遠。
其實本來我哋都有個機會join local tour，就係因為佢地介紹咗一間agent畀我哋，只係我哋唔甘心，點解會介紹間全市最貴嘅，或者我哋真係太知慳識儉，就係唔鍾意蝕底，結果行咗兩日都只係見到門外嘅價目表。

真係唔可以亂跟一本旅行書，特別係寫得差嘅旅行書，地圖都唔清唔楚，只係揾火車站，一望無際只係見到路軌!!

路過有好多華欣人，問路都係無從入手。「我哋只係識泰文㗎！」

大汗疊細汗先行完路軌有市集，似乎近喇，仲見到髮型屋。

最美麗的華欣火車站啊，見到呢啲求鬼其又「老實到唔識包裝」嘅介紹，真係令我諗番「一個海港得一個海港城」其實唔係咁差。

所以話，買旅行書都係買本用字生鬼嘅好，未出發先興奮﹣其實幾重要㗎！！

(泰國旅記2009之四）

泰國旅記連載
旅記1 - 曼谷．真夏
旅記2 - 凱旋廣場．旅行歌單
旅記3 - 09 S/S resort style

不到半年又再去澳門，呢次係因為突然得到船票於是過大海，決定跳過上次去嘅賭場、葡撻、賭場同埋葡撻。
飲飲食食唔少得，不過跟同行一樣唔好葡國菜同自助餐，於是我做嚮導尋地道好味。

一想到地道美食就諗到三盞燈嘅南亞小吃店，三盞燈其實唔難揾，不過坐巴士嘅話就要揾高士德站，因為三盞燈其實即係五支旗桿，到坐車時候都要揾經碼頭嘅車同樣道理。到咗三盞燈，條條街都有嘢食，緬甸菜、馬來亞菜、越南菜、咖啡店快餐店都有，不過既然要特登去當然有目標啦...
今次一心諗住番尋味嘅係小熊貓的椰汁喇沙，當年食完仲要拎外賣紙夜晚喺酒店買外帶(店方面都相當貼心，真係夜媽媽送幾兜喇沙到酒店樓下)，或者就係對佢哋呢種好客之道有啲情意結（當然都因為太好食），於是今次真係帶住個肚去食。
點知，有啲嘢無咗就真係無咗，位於三盞燈附近間本店摺咗，心諗，唔通啲好嘢食真係畀賭場同自助餐搶哂生意做唔住？

有相為證，真係摺咗！

好，呢個時候我哋改道去揾網上唔少人提到嘅「成群小食店」，話咁快，原來間舖就係三盞燈迴旋處，皇天不負有心人，但係又令我諗起以前同樣喺呢個迴旋處有間什麽「檳城小食」，有好好吃的炒麵。

椰汁咖喱雞喇沙麵，有湯吃／炒吃，另外仲點咗味道一般嘅炸豆（硬脆嘅）／魚片（乾身），整體嚟講未去到要拎外賣紙嘅級數，不過如果揾地道嘢，呢間都算係三盞燈區比較數一數二，無理由唔試嗰種。
食完閃，去揾出名豆腐花，唔好又諗係義順，香港都有得食，過得大海無理由都仲要幫襯義順嘅，又係多得google maps，如果唔係點會諗到呢間「順德行」隱藏喺民居小巷入面!!

本來打算打孖一凍豆花加豆漿，點知豆漿都畢業喇，所以唔好太遲去，畀個brenchmark你，我係四點幾到嘅。
匆匆來匆匆去，因為五點又要趕返氹仔睇Show。

睇完太陽劇團表演，又轉演到最後一站飲飲食食﹣議事廳附近的「餃餃鎮」，名符其實，係餃子店。

除咗蒸餃煎餃炸餃，點少得湯餃呢，呢味最特別，用豆漿底煮雲吞啊!
始終，豆漿無走甩。

唔認堅為食都唔得，最後再去魔術豆cafe 食一口咖啡方旦糕宵夜。

慳家budget 小預算 (食嘢真係可以平過張船票)
「成群小食店」　每位~$30
「順德行」　　　每位~$10
「餃餃鎮」 每位~$40
「太陽劇團」　　每位 $188 （周末下午優惠場）
「魔術豆cafe」 每位~$30

在雜誌發現好一陣子的新跑鞋，碰巧早前崇光百貨店周年慶，Nike free 5.0終成獵物。
舒適度還可以，比較特別是看來很笨重，但上手相當輕巧，話說回來，外型也是重要考量，其實家還有一對可帶到健身室跑步的everyday free，這對則是買來出外隨時想跑，也可以即興衝去跑步場跑的裝備。

不過怎麽沒有支援nike+呢，真是一大敗筆！